عرف كلبك علي العالم

فريدة كان نفسها جداً تجيب كلب عشان تحطه في الجنينة بتاعتها و تلعب معاه ، وفعلاً جابت كلب عنده 9 شهور.

أول ما جابته كانت فرحانه بيه جداً ، بس قابلت مُشكلة .. انها كل ما تخرج عشان تلعب معاه تلاقيه بيستخبي منها ، ومش عايز يلعب معاها خالص ، مع انها حاولت معاه كتير و جابت له لعب كتير ، بس برضو نفس المُشكلة مش عايز يلعب معاها.

تعالوا نفهم مع بعض ايه سبب المُشكلة دي ..

خلينا متفقين ان الأليف زي الأطفال بالظبط ، فـ بالتالي بنعّرف الأليف في بداية حياته علي كل حاجة حواليه، في الأول ممكن تلاقيه خايف ، مره تانية بيبعد عنك ، و ده لأنه مبيبقاش مُدرك العالم اللي حواليه لما بيتولد.

كمان انت تُعتبر جزء مُهم في حياته، فبِقدر اهتمامك بيه، هتلاقيه بقي اجتماعي و قادر يتعامل مع البيئة اللي حواليه، اما لو اهملته هتلاقيه مُنطوي و خايف من كل حاجه. و فكرة تربية الأليف بتعتمد علي تأقلمه علي المكان اللي هو فيه و تعرفه عليه، زي ما “طرزان” عاش في الغابة، و تأقلم علي ان هي دي بيئته الطبيعية.

فـمثلاً لو جبنا كلب قعد فترة مع مجموعة قطط ، غالباً عند عمر 12 أسبوع هتلاقي الكلب موجود مع القطط عن باقي الحيوانات. و ده نتيجة لـ تأقلمه أن يعيش معاهم في سنه الصغير.

الأليف في مرحلة الـ Sensitive Period

من عمر 3 أسابيع بتبدأ مرحلة مهمة جداً في حياة الجراوي ، و هي الـ Sensitive Period ، و دي المرحلة اللي من خلالها بيتعامل الأليف مع العالم اللي حواليه و يتعرف عليه، فده بينعكس بشكل كبير علي بقيت تصرفات الجرو.

– طيب و المرحلة دى هتأثر على تصرفاته ازاي بقي ؟

المرحلة دي بتأثر عليه سواء بالسلب أو الإيجاب، بمعنى :

* إذا كان الأليف عنده تجربة سيئة أو حتى معندوش تجربة في المرحلة دي علي الإطلاق، ده هـ يؤدي لوجود مشاكل كتير بقيت حياته، زي انه ممكن يخاف منك اومن لعبه، وهـ يعتبر اي شئ جديد خطر بالنسباله .*زي كلب فريدة خاف منها و من الألعاب بتاعته، واستخبى و مرضاش يلعب*. و عادةً بترجع مُشكلة الخوف في الكلاب، أنهم في الأصل بينتمو لفصيلة الذئاب، في الحياة البرية بيكونوا في حالة يقظة دايما، ومتوقعين وجود أي خطر عليهم، فـ عشان كده يعتبروا اي حاجه غريبة خطر عليهم. * اما الأليف اللي بيعدي من المرحلة دي بشكل صحيح، بينعكس بعد كده علي تصرفاته بشكل كبير. بتلاقيه بيسمع كلامك بسهوله و ذكي جداً في تصرفاته و قادر يفهمك. لأنه بيكون تأقلم على البيئة اللي حواليه و قادر يتعامل معاها بسهولة.

* ملحوظة :

الاهتمام بـ الأليف في المرحلة دي مهمة جداً، لأن تعليمه و تأقلمه بيكون أسهل من تأقلمه في المراحل المتقدمة من عمره. لأن في المراحل المتقدمة التعامل معاه هيكون بشكل علاجي أكتر ما هيكون تعليمي. “مش بعد ما شاب .. ودوه الكُتاب”، فـ عشان كده بنلجأ للعلاج الدوائي لو الكلب كبير في السن زي كلب فريدة. 5 نصايح عشان كلبك يكون اجتماعى و زي ما قولنا في الاول انك الجزء المهم والمحور الأساسي اللي بيتمحور عليه حياة الأليف، فـ هنا بيجي دورك إنك تعرف الأليف علي العالم اللي حواليه عن طريق الـ Tips دي :

1- تقدر تزود من الزيارات الاجتماعية، فيتعود علي وجود ناس كتير في البيت، و يتعود علي التعامل معاهم.

2- بالنسبة لأكله تحاول تخلي كل أفراد الأسرة تديله الأكل بتاعه، عشان يكسر حاجز الخوف عنده و نمنع التصرف بسلوك عدواني لو حد اداله اكل.

3- تقدر كمان تهتم جداً بنظافته كل يوم حتي لو هو مش محتاج ده ، لمجرد بس انك تقوي علاقتك بيه و تعوده انه يسمع كلامك و يكون تابع ليك. 4- تخلي كلبك اجتماعي اكتر بانه يتعامل مع كلاب تانية، بس حاول تلبسه كمامة علي بقه عشان ميبدأش يهاجم الكلاب التانية بسبب خوفه أو كوسيلة دفاع عن نفسه. 5- ابدأ خرج كلبك بس باستخدام الـ leash و الـ Muzzle و خليه يشوف العالم من حواليه و حبه بـ حبه شيل الـ Muzzle ثم الـ Leash لحد ما ينتهي المطاف أنك بتشارك بيه في مسابقات الكلاب