صحة و تغذية أليفك في سؤال و جواب

ساعات كتير بيدور في بالك أسئلة عن قطتك أو كلبك، مرة تلاقيه مش عايز ياكل، ساعات مش بيسمع الكلام، مرة تانية يظهر عليه شوية أعراض غريبة، فأنت بتبقي محتاج تعرف هل دي أسباب مرضية و لا نفسية أدت للأعراض دي، و ساعات بتبقي عايز تعرف إيه أحسن أكل ليه، أكل البيت و لا الـ Dry، و إيه أحسن نوع !

وعشان صحتهم و تغذيتهم أهم حاجه عندنا، جمعنا أغلب الأسئلة اللي إتسألناها من الناس اللي بتربي حيوانات أليفة، و جاوبنا عليها.

يعني تقدر تعتبر المقال ده دليلك البيطري في البيت.

ودي إجابات واحد من الدكاترة اللي معانا في الفريق د/ هشام.

فتعالوا نشوفها مع بعض ..

1- الأكل البيتي أحسن و لا الـ Dry Food؟

دي من الأسئلة المُنتشرة جداً، لأن في ناس جربوا الـ Dry Food و سَبب مشاكل للأليف بتاعهم ! لكن الفكرة كلها تتلخص في نوع الـ Dry Food ده، , في أنواع سيئة مبننصحش بيها خالص لأنها فعلاً بتسبب مشاكل ليهم زي حصاوى على الكلي أو في المجري البولي إلخ إلخ …

ولكـن

هيفضل الـ Dry Food (اللي نوعه كويس) هو الأحسن ليهم من أكل البيت، لأن جسمهم عبارة عن شعر مش جلد زينا، فبيحتاج عناصر غذائية زي Vit. E و Omega 3 و Omega 6 و Omega 9 و Selenium و Biotin .. و كل العناصر دي مش موجودة في أكل البيت!

و كمان الـ Dry Food مهم جداً للكلاب، لأنه فيه Glucosamine اللي بيحمي مفاصلهم من الـ Hip Dysplasia، و دي عبارة عن تحرك المفصل من مكانه و أوقات بتحتاج لعمليات جراحية لو Severe case، فنبعد عن الدوامة دي أحسن !

و دي شوية أسماء للـ Dry Food اللي بننصح بيهم :

• للقطط : – MERACAT: و ده يُعتبر أكل كامل مُتكامل للقطط، لأن كل العناصر فيه متوازنة جداً ومن جودة عالية جداً بجانب إنه سهل الهضم، و فيه كل المكونات اللي القطة بتحتاجها من بروتينات و ڨيتامينات و معادن و كربوهيدرات و دهون.
  

• للكلاب :
  

• Belcando و ده مُحبب جداً للكلاب، لأنه بيحتوي علي chicken meal، و ده طبعاً علشان طعهما، لكن بقي كـ قيمة غذائية فهوغني جداً بالمكونات اللي جسمه بيحتاجها.

2- القطة مش بتاكل إلا نوع واحد بس من الاكل ، اعمل ايه؟

و دي تعتبر مُشكلة في حد ذاتها، لأن كده القطة مش بتاخد كل العناصر الغذائية اللي هي محتاجها، بس حل المُشكلة دي سهل و بسيط ! الفكرة في تنظيم مواعيد الأكل، تحطلها الأكل اللي عايزها تأكله في وقت معين لمدة 10 دقايق و بعدين تشيلة سواء كلت أو لأ ! و حطه بعديها بفترة، مرة في مرة هتبدأ تاكل.

3 – هيحصل إيه لو القط أكل Dry Food كتير؟

من طبيعة الـ Dry Food إن حجمه بيزيد و بينفش بالمايه، فلو حطيت أكل كتير، القطة هتاكل كتير والأكل هينفش في بطنها وهترجع، فحاول تخلي كمية الأكل مناسبة.

4 – ويا تري إيه الكمية المناسبة للـ Dry Food ؟

كمية الـ Dry Food بتختلف من القطة للكلب.

بالنسبة للقطط : 40 جرام علي مدار اليوم ، تقريبا نص كوباية شاي. أيوه متستغربش .. زي ما قريت. أما بالنسبة للكلاب : 200 جرام.

5- إزاي أخلي الأليف يسمع كلامي ؟

و السؤال ده ممكن يتكرر مع الناس اللي جابوا الأليف بتاعهم و هو كبير.. بس مفيش مشكلة ، كل حاجه وليها حل

خلينا الأول نعرف حياه الأليف عبارة عن إيه ؟ .. هي عبارة عن أكل و لعب.

إذن يبقي هما دول الحاجتين اللي يخلوك تتحكم في الأليف و يسمع كلامك ..

ازاي برضو؟

في ناس بيخلوا الأكل محطوط 24 ساعة قدام الأليف ، يأكل وقت ما يجوع ، فبالتالي مش هيبقي محتاج لهم في حاجه ، و في اللحظة دي ممكن نفقد سيطرتنا عليهم !

طب إنت المفروض بقى تعمل إيه عشان تخليه يسمع كلامك؟

حطله الأكل في مواعيد دورية كل يوم ، بمعنى إنك تحط له الأكل لمدة 10 دقايق ، و بعدها تشيله وتحطه تاني بعد 8 ساعات وهكذا. اللي عايزين نعمله اننا نخليه يجوع في الحالة دي فيحتاجك ! ملحوظة: لو يوم أو يومين مكلش مش هيحصل حاجه، أكتر من كده يبقي في مُشكلة في الأكل ولازم يتبدل.

تاني حاجه تخليك تتحكم فيه هي اللعب و خصوصاً في الكلاب.

وقت ما تيجي القطة أو الكلب تيجي تقعد تلاعبك تبدأ تسيب اللي في إيدك و تلاعبها، من هنا هنفقد سيطرتنا عليهم. فلازم التحكم يكون من عندنا ألاعبه في الوقت اللي أنا عايزه.

حاجه كمان للكلاب، في short leesh نقدر نستخدمه للكلاب في التمشية بحيث تخلي نص الكلب وراك و نصه قدامك (يعني يُعتبر تخلي الكلب ماشي موازي ليك )، لو مشي قدامك يبقى هو كده اللي واخد الـ leadership ، ولو مشيته وراك مش هتبقي شايفه !

… دول كانوا شوية أسئلة من اللي إتبعتوا .. لسه في أسئلة تانية كتير هنزلها إن شاء الله عشان بس صحة و تغذية أليفك، اللي زي ما إتفقنا إنها أهم حاجه عندنا. لو عندك سؤال عايزنا نجاوبك عليه فـ احنا فاتحين الـ Free Consultation لمدة اسبوع واحد بس، و هى عبارة عن Call مدته ربع ساعة، تتواصل فيه مع دكتور متخصص في الحيوانات الأليفة، تقدر تسأله عن كل مشاكل صاحبك الأليف و تفهم منه أكتر عن أى حاجة بتقلقك عشان في الآخر تكون مطمن عليه و هو يكون سعيد و مبسوط

01201568888

1- إيه الأكل اللي ممنوع أديه للقطط ؟

أي حد عنده قطة بتردد عنده مقولة ” القطط بسبع أرواح ” .. مش صح ؟!

اه هما بـ7 أرواح، بس مش و هما بياكلوا، فـ مهم جداً ناخد بالنا من الأكل اللي بندهولهم، لأن زي ما في اكل مُفيد ليهم، في أكل تاني بيضرهم.

مثال للـ الاكل اللي لازم نبعد عنه:

1-الشيكولاتة : الشيكولاتة غنية بمادة اسمها Theobromine و هي دي بقي المُشكلة . لانها بتفضل في دم القطة لمدة 24 ساعة و البنكرياس بتاعها مبيعرفش يهضمها، فخد بالك إن نسبة عالية منها ممكن يسبب تسمم للقطة.

2-العضم : القطط بتحب العضم جدا ، حتى فيه ريحة الفراخ ! بص يا سيدي

القطط زي الأطفال الصغيرة معدتهم رقيقة، فلما بياكلوا العضم المطبوخ بيقطع في جدار البطن، بجانب إن العضم صعب في الهضم.

3-الثوم و البصل و التوابل : و أنت بتاكل بتلاقي القطة عايزة تاكل معاك، مش قطتك بتعمل كده ؟ لكن خلي بالك إحنا البني آدمين مُعظم أكلنا فيه توابل و توم و بصل، و دول مُضرين جداً على القطط لأن زي ما قولنا إنهم كائنات رقيقة. بيعملهم ايه بقي الثوم و البصل و التوابل؟ ده كُل شغلتهم إنهم يدخلوا علي خلايا الدم الحمراء يكسروها، فـ هتلاحظ إن الأليف بقي ضعيف بسبب الأنيميا .

2- إيه سبب وقوع شعر القطة كتير ؟

وقوع الشعر من الأعراض المنتشرة، و ليه أسباب كتيرة، منها مرضية و تانية نفسية. لكن من أكتر الأسباب المُنتشرة هي وقوع مناعة القطة . مثلا لو سافرت ،عزلت، إديت القطة لحد من أصحابك فترة، هي بتحس إنها غيرت مكانها، فبتتأثر نفسياً لأنها بتحس إنها غيرت مكانها، وشعرها يبدأ يُقع لأن الجلد يُعتبر أول خط لجهاز المناعة.

فيه أسباب تانية لوقوع الشعر زي :

• غسيل الأرض بمنظفات عشان بيسبب لهم حساسية وبالتالي الشعر هيبدأ يقع. فممكن في الحالة دي نبعد القطط عن مكان اللي فيه المنُظفات لحد ما ينشف.

• إستخدام شامبو بشري ( بعضهم مش كلهم ) بيساعد علي وقوع الشعر.

• وجود ديدان في البطن اللي بيخليك تلاحظ إن القطة خاسه بشكل جامد.

• الكلبة في فترة الـ Period، أو الكلب في فترة الجواز.

3- ليه بلاقي القط بتاعي بيهرش عند ودنه كتير ؟

في مرض مُنتشر جداً في القطط بشكل كبير، لكنه قليل نسبياً في الكلاب و اسمه الـ (Ear Mites) أو (جرب الأذُن). و هي عبارة عن حشرة بتلاقيها جوا أذن القطة عامل زي تفل الشاي، و بيتنقل نتيجة عدوي من كلب أو قطة تانية . متخافش، مبيتنقلش للبني آدمين ! و علاجه ايه بقي ؟ علاجه بسيط، نقط في الأذن إسمها Bars بيتحط في الأذن مرة كُل يومين لمدة ثلاث أو أربع أيام.

4- إيه أحسن نوع لـ رمل القطط ؟

رمل القطط 3 أنواع:

• أول واحد الـ Clumbing : ( يعني الرمل اللي بيتكور 😀 ) .. حلو ده ، بيتكور إزاي ؟ يعني بيتحول إلي كور بعد ما القطة تعمل فيه، فبيّسهل عليك إنك تشيلة بالجروف ، زي الـ BioKat’s و Tidy Cat.

• أما الـ Non-Clumbing : ( و ده بقي اللي مبيتكورش 😀 ) تقدر تستخدمه في حالة انك مش فاضي تغير للقطة كل يوم بالجروف، لأنه مش بيتحول لكور ، زي : Tidy Cat أو Fresh step.

• و البريمو بتاعهم هو الـ Crystals ، و ده الحلو فيه إنه ممكن يتغسل و تسيبه ينشف في الشمس وتقدر تستخدمه تاني، فـ هيوفر معاك جامد و يقعد فترة ، زي الـ Silica crystals.

5- ساعات بلاقي القطة بتعمل بره الـ Litter box ليه ؟

التصرف ده بيبقي لسبب من الأتنين :

الأول : إن القطة بيبقي عندها حصاوي و بتتوجع و هي بتعمل Urine، فبتحاول تعمل في مكان تاني عشان فاكرة إن الوجع بسبب الرملة.

السبب التاني : في فترة جواز القط ، بيتعمّد يعمل بره الـ litter box علشان يجذب باقي القطط ليه من الريحة النفاذة بتاعته.

6- قطتي بتاكل كتير و بتخس و كشفت عليها معندهاش حاجه!

غالبا الحكاية دى بترجع لـ 3 أمور:

1- الأكل نفسه

ممكن تكون نسبة الڨيتامينات اللي في الأكل قليلة ، والفتيامنات هي اللي بتعلي نسبة تحويل الأكل في الجسم و بتخلي الجسم يستفاد من الأكل. و في الحالة دي بنلجأ لـــ فاتح شهية، يخلي جسم القطة يستفاد من كل عناصر الأكل زي : Sanal ,Canina V 25, Canilatine , A plus B.

2-الحالة النفسية كمان بتاعت القطة!

القطط بتتاثر بالسلب لو سبتها و سافرت أو مبتقعدش معاها أو غيرت المكان اللي عايشة فيه.

3- ديدان

من أشهر الأسباب في نقص الوزن رغم الاكل الكتير هو الديدان ، ودي حلها بسيط قرص Drontal والموضوع انتهى.

7- الكلب بياكل كام مرة في اليوم؟

كل عُمر و ليه كمية أكل مُعينة بياكلها الأليف .. و هما صغيرين غير لما يكبروا !

• فـ بداية من أول ما يتولد لحد عمر شهرين : بياكل 5 مرات في اليوم ، وما يُعادل 400 لـ 500 جرام .

• من شهرين لست شهور : بياكل من 3-4 مرات في اليوم ويبدأ يزيد شوية لـ 900.

• من ست شهور لـ 12 شهر : بياكل 2-3 مرات، يعني 1400 جرام .

• من سنه فيما فوق : من مرة إلى مرتين في اليوم / 1400 – 2000 جرام.

…

ودي كانت الأسئلة اللي بتتكرر مع مُعظم الناس اللي عندها كلاب و قطط ، و أكيد في أسئلة تانية كتير عند كل واحد فيكوا لسه عايز يسألها.

الـ Free Consultation مفتوحة بداية من النهاردة لحد يوم الاربع اللي جاي ، سجل رقمك وهيكلمك دكتور متخصص يجاوب على كل الاسئلة اللي انت عايز إجابتها عن الأليف ..

سجل من المدونة